Landsliðsfyrirliðinn Guðjón Valur Sigurðsson meiddist í fyrri hálfleiknum í leiknum gegn Hollendingum á fjögurra þjóða mótinu sem lauk í Noregi í gær. Guðjón haltraði af velli á 22. mínútu og kom ekkert meira við sögu eftir það.
„Við vitum ekki hversu slæm þessi meiðsli eru hjá Guðjóni. Það er sin við hnéð sem hefur verið að angra hann í einhvern tíma. Maður er aldrei í rónni þegar menn eru með sinarmeiðsli en vonandi er þetta ekkert alvarlegt,“ sagði Guðmundur Þórður Guðmundsson landsliðsþjálfari í samtali við Morgunblaðið í gær.
Sigvaldi Guðjónsson, Stefán Rafn Sigurmannsson og Arnar Freyr Arnarsson léku ekki með á mótinu í Noregi og spurður út í þá sagði Guðmundur;
Sigvaldi er á réttri leið og við erum bjartsýnir á að hann nái sér að fullu. Stefán Rafn Sigurmannsson fékk líklega inflúensu og það tekur tíma fyrir hann að jafna sig á henni og við þurfum að taka stöðuna á Arnari Frey sem nefbrotnaði á dögunum. Við höfum verið með prógramm fyrir Arnar heima og það er búið að smíða fyrir hann grímu sem hann getur notað á æfingum. En læknar telja að hann eigi að verða klár í fyrsta leik,“ sagði Guðmundur.
Sjá allt um íslenska landsliðið í íþróttablaði Morgunblaðsins í dag