„Liðið er á hárréttri leið“

Morgunblaðið leitaði viðbragða hjá Páli Ólafssyni að loknum fyrsta leiknum á HM en Páll er fyrrverandi landsliðsmaður og atvinnumaður og síðar þjálfari.

„Mér fannst margt vera jákvætt í þessum leik. Mínar væntingar til þessa liðs í mótinu eru á þá leið að það bæti sína handboltagetu og þessi frammistaða var í takti við það. Ég hef einnig fylgst með liðinu í aðdragandanum og það er á hárréttri leið. Jafnvel er það komið lengra en ég bjóst við.

Þetta er eitthvað til að byggja á og menn eiga ekki að svekkja sig of mikið á þessu tapi. Ekki voru gerðar miklar kröfur fyrir fram um sigur í þessum leik þótt vissulega ættum við tækifæri í leiknum. Ef menn fara ekki að dvelja við það þá hef ég engar áhyggjur af framhaldinu,“ sagði Páll sem lék sem leikstjórnandi í landsliðinu á sínum tíma og hann hreifst af frammistöðu leikstjórnandans Elvars Arnar Jónssonar.

Sjá viðtal við Pál í heild í íþrottablaði Morgunblaðsins í dag.