James Harden átti frábæran leik fyrir Brooklyn Nets í 112:107-sigri liðsins gegn Minnesota Timberwolves í NBA-deildinni í körfuknattleik í nótt.
Harden náði þrefaldri tvennu þar sem hann skoraði 38 stig, tók 11 fráköst og gaf 13 stoðsendingar.
Í upphafi fjórða og síðasta leikhluta var Brooklyn 10 stigum yfir, 87:77, en Minnesota gafst ekki upp og minnkaði muninn í 108:107. Lengra komust þeir þó ekki þar sem Harden og Kyrie Irving gerðu síðustu fjögur stig leiksins úr tveimur vítaskotum hvor.
Í liði Minnesota var Karl-Anthony Towns öflugur með tvöfalda tvennu. Hann skoraði 31 stig og tók 12 fráköst.
10 aðrir leikir fóru fram í NBA-deildinni í nótt, hér má sjá öll úrslit næturinnar:
Brooklyn – Minnesota 112:107
Washington – Indiana 132:124
New York – Miami 88:98
Boston – New Orleans 109:115
Detroit – Toronto 118:104
Houston - Memphis 110:120
Oklahoma – Dallas 106:127
San Antonio – Sacramento 115:132
Utah – Cleveland 114:75
Golden State – Chicago 116:102
LA Clippers – Milwaukee 129:105