Valur vann öruggan 96:71-sigur á Tindastóli þegar liðin mættust í Origo-höllinni að Hlíðarenda í úrvalsdeild karla í körfuknattleik, Subway-deildinni, í kvöld.
Mikið jafnræði var með liðunum til að byrja með og leiddi Valur með einu stigi að loknum fyrsta leikhluta, 23:22.
Valsmenn hertu aðeins tökin í öðrum leikhluta og var með átta stiga forskot í hálfleik, 47:39.
Í síðari hálfleik héldu heimamenn einungis áfram að auka forskot sitt og unnu að lokum afar sannfærandi 25 stiga sigur, 96:71.
Landsliðsmaðurinn Kristófer Acox átti frábæran leik fyrir Val þegar hann náði tvöfaldri tvennu. Skoraði hann 24 stig og tók 12 fráköst.
Stigahæstur í leiknum var hins vegar liðsfélagi hans Pablo Bertone, sem átti sömuleiðis stórleik og skilaði 32 stigum.
Stigahæstur í liði Tindastóls var Javon Bess með 22 stig.