Gamla brýnið LeBron James átti enn einn stórleikinn fyrir LA Lakers þegar liðið hafði betur gegn New York Knicks, 129:123, eftir framlengdan leik í New York í NBA-deildinni í körfuknattleik í nótt.
James náði þrefaldri tvennu og var stigahæstur í liði Lakers með 28 stig. Tók hann tíu fráköst og gaf 11 stoðsendingar að auki.
Anthony Davis var skammt undan með 27 stig og níu fráköst.
Stigahæstur í leiknum var hins vegar Jalen Brunson með 37 stig fyrir New York.
Giannis Antetokounmpo var þá í essinu sínu þegar Milwaukee Bucks lagði Charlotte Hornets að velli, 124:115.
Grikkinn öflugi skoraði 34 stig og tók auk þess 18 fráköst.
Serbinn magnaði Nikola Jokic var þá með þrefalda tvennu fyrir Denver Nuggets þegar liðið vann New Orleans Pelicans, 122:113.
Jokerinn skoraði 26 stig, tók 18 fráköst og gaf 15 stoðsendingar.
Öll úrslit næturinnar:
New York – LA Lakers 123:129 (frl.)
Milwaukee – Charlotte 124:115
Denver – New Orleans 122:113
Cleveland – Miami 97:100
Chicago – LA Clippers 103:108