Tekjur í sjávarútvegi drógust saman um 25 milljarða króna árið 2016, eða um níu prósent. Allar líkur eru á að afkoma fyrirtækja í sjávarútvegi versni enn nokkuð á yfirstandandi rekstrarári. Þetta kemur fram í samantekt Deloitte á rekstri sjávarútvegsfélaga, sem gerð var að beiðni atvinnuvega- og nýsköpunarráðuneytisins.

Fram kemur í skýrslu Deloitte að afkoma botnfiskútgerða og -vinnslu hafi versnað mest milli ára og félög í botnfiskútgerð orðið af mestu tekjunum. Afkoman hafi þá versnað óháð úthlutuðum afla, en stærri félög virðist þó eiga auðveldara með að ná fram kostnaðarsparnaði á móti tekjusamdrætti.

Tekjutapinu var enda að hluta mætt með lækkun kostnaðar en EBITDA félaganna mun hafa lækkað um 15 milljarða króna, eða um 22%.

Styrking krónunnar ekki aðeins neikvæð

Verðlag sjávarafurða hafi lækkað verulega í íslenskum krónum á sama tíma og launavísitala hafi hækkað töluvert. Þrátt fyrir að styrking krónunnar hafi haft neikvæð áhrif á tekjur greinarinnar hafi hún þó án efa unnið með greininni að hluta hvað varði ýmis keypt aðföng s.s. olíu, varahluti, veiðarfæri og umbúðir.

Lækkun olíuverðs hafi þá haft nokkuð jákvæð áhrif á afkomu síðasta árs en það sé tekið að hækka að nýju á þessu ári.

Í skýrslunni segir að takist að veiða þann afla, sem ekki tókst að veiða í verkfallsmánuðum fyrri hluta ársins, gæti afkoma þó aukist lítið eitt milli ára.

Tekið er fram að skuldastaða greinarinnar í heild hafi þróast með jákvæðum hætti að því leyti að heildarskuldir hafi lækkað og eiginfjárhlutfall hækkað. Lækkun skulda megi að nokkru leyti rekja til styrkingar krónunnar sem leitt hafi til lækkunar skulda í erlendri mynt.

Ólíklegt að náist að eyða verkfallsáhrifum

Í skýrslunni er greint frá því að á fyrstu átta mánuðum þessa árs sé veitt magn orðið tæplega 7% meira en á síðasta ári. Muni þar mestu um auknar veiðar á loðnu miðað við árið í fyrra.

Á nýliðnu fiskveiðiári hafi aflaheimildir aukist um 22% samanborið við fiskveiðiárið 15/16, en afli til aflamarks hins vegar staðið því sem næst í stað milli ára.

„Eitthvað af því sem ekki veiddist flyst á það fiskveiðiár sem nú er hafið en ólíklegt má teljast að verkfallsáhrifum verði að fullu eytt innan rekstrarársins 2017,“ segir í niðurstöðum skýrslunnar.

Í hnotskurn

• Heildarafli dróst saman um tæp 19% á síðasta ári.
• Samdrátturinn skýrist að nær öllu leyti af bresti í loðnuveiðum á því tímabili.
• Verðlag sjávarafurða í erlendri mynt hækkaði að meðaltali um 2,9% milli ára.
• Verðlag í íslenskri krónu lækkaði hins vegar að meðaltali um 6,4%.
• Vísitala launa hækkaði að meðaltali um 11,4% á síðasta ári.
• Tæplega helmingur launakostnaðar sjávarútvegs er í formi aflahlutar sjómanna og sá hluti kostnaðar fylgir því tekjum greinarinnar.
• Tekjur lækkuðu um 12% hjá fyrirtækjum með mestu aflaheimildirnar.
• Frekari greiningar leiddu hins vegar í ljós að stærri félögin náðu frekar að spara nokkurn kostnað á móti tekjutapi.
• Úttekt Deloitte byggir á ársreikningum sjávarútvegsfélaga fyrir árið 2016.
• Gögnin ná til um 90,6% þorskígilda.

Tengdar fréttir

Samdráttur í sjávarútvegi

Hagræðing í skipastól Síldarvinnslunnar

• Uppsagnir þungt högg fyrir samfélagið
• „Þarna eru mörg störf sem eru að tapast“
• 32 sagt upp störfum í Stykkishólmi
• Gagnrýni LS á starfsháttum Hafró vísað á bug

» Fleiri tengdar fréttir

• Blogga um frétt