Gera hlé á kolmunnaveiðum

„Við vorum fimm daga að veiðum 60-70 mílur austur af landinu og það var einungis dregið á daginn. Þetta var vinna frá sjö til fimm og síðan látið reka yfir nóttina. Kolmunninn hverfur alveg þegar dimma tekur.“

Þetta segir Sturla Þórðarson, skipstjóri á Beiti NK, en skipið hélt til kolmunnaveiða og landaði 330 tonnum aðfaranótt sunnudags. Haft er eftir honum á vef Síldarvinnslunnar að aflinn hafi verið afar rýr.

Beitir mun nú halda vestur fyrir land og hefja veiðar á íslenskri sumargotssíld.

Bjarni Ólafsson AK, sem að undanförnu hefur lagt stund á kolmunnaveiðar austur af landinu og landað þrisvar, samtals 2.400 tonnum, liggur nú í höfn í Neskaupstað og mun ekki halda áfram kolmunnaveiðum að sinni. Skip Síldarvinnslunnar hafa því gert hlé á veiðum á kolmunna.

• Blogga um frétt