Hitti bjargvættina frá Vestmannaeyjum

Bart Gulpen, belgískur sjómaður sem bjargaðist þegar belgíski togarinn Pelagus strandaði við Heimaey í janúar 1984, heilsaði í dag upp á Vestmannaeyinga sem komu að björgun hans fyrir rúmum 30 árum.

Gulpen er staddur hér á landi í tilefni af útkomu bókar Óttars Sveinssonar, Útkalls – Reiðarslags í Eyj­um. Í bókinni eru björg­un belg­íska tog­ar­ans Pelagus­ar við Vest­manna­eyj­ar gerð skil. Þar björguðust sex belg­ísk­ir sjó­menn en tveir fór­ust ásamt tveim­ur ís­lensk­um björg­un­ar­mönn­um.

Gulpen var aðeins 17 ára þegar slysið varð. Bókin var kynnt í gær og þá hitti hann bjargvætt sinn, Guðmund Ólafs­son, sem tókst að hífa Gulpen upp úr öldu­rót­inu.

Frétt mbl.is: Tilfinningaþrungin stund í Hannesarholti

Í dag hélt Gulpen ferð sinni áfram ásamt Óttari og lá leið þeirra meðal annars á spítalann í Vestmannaeyjum þar sem þeir hittu Selmu Guðjónsdóttur, þáverandi hjúkrunarforstjóra, Laufeyju Sigurðardóttur, þáverandi sjúkraliða, Bjarneyju Pálsdóttur, þáverandi og núverandi sjúkraliða, Elisabetu DeWulf, eiginkonu stýrimanns á Pelagus, og Guðmund Richardsson, þáverandi hjálparsveitarmann.

Vel fór á með Gulpen og Vestmannaeyingunum og var stundin ekki síður tilfinningaþrungin en í gær.

• Blogga um frétt