Metbáturinn veiddi 152 hrefnur

Norskir hvalveiðibátar komu í ár með 432 hrefnur að landi og er það talsverður samdráttur frá síðasta ári er hrefnurnar voru 591. Í norska blaðinu Fiskaren kemur fram að komið var að landi með 622 tonn af kjöti í ár, en 776 tonn í fyrra. Lélegur afli var meðfram strönd Noregs, en skárri við Svalbarða og Bjarnarey.

Fimmtán bátar í Noregi höfðu leyfi til veiðanna, en aðeins ellefu hófu veiðar og lönduðu hjá tveimur fyrirtækjum. Hrefnukvóti ársins var 999 dýr svo nokkuð vantaði upp á að hann næðist. Í dag hefst í Noregi ársfundur samtaka þeirra sem veiða minni hvali og verður greint frá kvóta næsta árs á fundinum.

Aflahæsti báturinn, Kato, veiddi í ár 152 hrefnur og er það meðal þess mesta sem norskur bátur hefur veitt í nokkra áratugi. Kjötið var unnið og fryst um borð og uppfyllti þannig kröfur um mögulegan útflutning til Japan, að því er fram kemur í Fiskaren.