„Þjóðin á betra skilið en þetta“
Setja bókamerki
„Nei takk, Lilja Rafney Magnúsdóttir, það hefur enginn beðið ykkur um að gera strandveiðikerfið jafn lélegt fyrir alla strandveiðimenn allt í kringum landið eins og þetta frumvarp miðar að.“
Þetta segir í yfirlýsingu frá smábátafélaginu Hrollaugi á Hornafirði, sem mótmælir með öllu frumvarpi atvinnuveganefndar um breytingu strandveiðikerfisins og ávarpar formann atvinnuveganefndar, Lilju Rafneyju Magnúsdóttur. Greint var frá frumvarpinu á vef 200 mílna á föstudag.
Borgi fyrir að landa ufsanum
Óhætt er að fullyrða að farið sé óvægnum orðum um frumvarpið í yfirlýsingu félagsins.
„Er það svona sem atvinnumálanefnd ætlar að efla atvinnu í landinu?“ er spurt, og einnig hvort atvinnuveganefnd ætli að láta strandveiðimenn, þann flokk útgerðar sem minnst beri úr býtum, vinna sem „þrælar ríkisins“ með því að veiða ufsa frítt handa ríkinu.
Axel Helgason, formaður Landssambands smábátaeigenda, hefur áður bent á að sjómenn borgi í raun fyrir að landa ufsa.
„Sérstaklega á strandveiðunum, því þó að meðaltal á fiskmörkuðum sé 64 krónur, þá er þetta litla magn sem kemur í veiðunum, kannski 20 til 80 kíló í róðri; það fer á svo svona 15 til 24 krónur og nær því ekki einu sinni upp í veiðigjöld og annan fastan kostnað.“
Frumvarpið þurfi að gera miklu betra
„Ætliði virkilega að stuðla að því að þetta kerfi verði áfram fátæktrargildra?“ er enn fremur spurt í yfirlýsingunni.
„Þjóðin á betra skilið en þetta og það þarf ekkert að reyna að segja þjóðinni að ekki sé hægt að efla þetta kerfi svo um munar. Það eru um 700 fjölskyldur allt í kringum landið sem reiða sig á þetta kerfi og þær eiga betra skilið þetta.“
Fullyrt er að frumvarpið þurfi að gera miklu betra, tryggja öllum strandveiðibátum 48 daga á sumri og ekki degi minna, sem þeir geti nýtt þegar aðstæður séu bestar til veiða yfir fjögurra mánaða tímabil.
Þá eigi ufsaveiðar að vera með öllu frjálsar, því fyrr verði hnignun smábátaútgerðar í kringum landið ekki stöðvuð.
„Fyrir hverja eru þið eiginlega að gera þetta? Við viljum frekar óbreytt kerfi en það sem stendur í þessu frumvarpi. Þjóðin á betra skilið en þetta.“
„Höfum ekki náð að skríða upp úr þeirri gryfju“
Sex hafa greinst með listeríu
Tveir í bílnum sem lenti utan vegar
„Hvílir mikil leynd yfir þessu öllu“
Skemmtiferðaskip hætt komið nærri Viðey
Shakespeare fannst í skókassa
Vélsleðaslys: Þyrlan kölluð út á mesta forgangi