Misjafn afli í blíðunni undan Færeyjum

„Við fengum um 450 tonn í gær eftir að hafa togað í eina 17 tíma og vorum þá komnir með 900 tonn í skipið. Við erum að hífa núna og ég held að það sé bara einhver skaufi – þetta virðist vera afar lélegt,“ segir Sturla Þórðarson, skipstjóri á Beiti NK, sem staddur er á kolmunnaveiðum sunnan við Færeyjar.

Á miðunum hefur verið blíðviðri undanfarna daga en aflinn hins vegar reynst misjafn. Sturla segir að ágætur afli hafi fengist í gær en í dag sé lítið að hafa.

„Ég heyri að skipin láta almennt illa af sér núna og það er ekki veðrið sem truflar því hér er renniblíða,“ segir Sturla.

Á vef Síldarvinnslunnar kemur fram að verksmiðja hennar á Seyðisfirði hafi lokið við að vinna kolmunnann sem þangað hefur borist í gærkvöldi, þannig að þar er vinnsluhlé. Vinnsluhlé var einnig í verksmiðjunni í Neskaupstað en þar hófst vinnsla á ný í gærkvöldi þegar Vilhelm Þorsteinsson EA kom með 1.700 tonn.

• Blogga um frétt