Aðeins sex hrefnur veiddar í sumar

„Við reyndum við þetta í júní en hættum svo,“ segir Gunnar Bergmann Jónsson, framkvæmdastjóri IP útgerðar sem gerir út bátinn Hrafnreyði KO á hrefnuveiðar. Sex hrefnur veiddust áður en veiðunum var hætt en Hafrannsóknastofnun telur óhætt að veiða 217 dýr á ári.

Gunnar segir að stækkun á friðuðu svæði á Faxaflóa geri hrefnuveiðimönnum erfitt fyrir. „Við þurfum að sækja miklu lengra út en áður. Til þess þurfum við fleiri réttindamenn um borð og það eykur kostnaðinn,“ segir Gunnar um ástæður þess að veiðum var hætt.

Hann segir að núverandi sjávarútvegsráðherra virðist ekki ætla að breyta friðunarsvæðinu sem forveri hans stækkaði. „Það er erfitt að vera í eltingarleik við annan hvern ráðherra sem sest inn í ráðuneytið. Það er þreytandi að þurfa alltaf að synda á móti straumnum,“ segir Gunnar og vísar til þess að friðunarsvæðið hafi áður verið stækkað.

Gunnar segir að kjötið af 6 dýrum dugi ekki lengi á markaðnum hér og segir að til greina komi að halda áfram innflutningi frá Noregi.

Útgerðin er að huga að öðrum verkefnum fyrir Hrafnreyði.