Sigla með makríl til Póllands og Litháen

Eimskip mun hefja siglingar beint til Gdynia í Póllandi og Klaipeda í Litháen. Siglingarnar verða tímabundnar meðan á makrílvertíðinni stendur og sigldar verða fjórar ferðir til Gdynia og Klaipeda með makríl.

Í tilkynningu frá Eimskip segir að umsvif Íslendinga í Eystrasaltslöndunum og Póllandi hafi aukist undanfarin ár. „Fyrirtæki og einstaklingar hafa aukið inn- og útflutning til og frá Eystrasaltslöndum, m.a. hefur uppsjávarfiskur verið fluttur til Póllands og Litháen. Nú sjá innflytjendur aukin tækifæri á hagstæðum viðskiptum í þessum löndum. Helstu vöruflokkar sem Íslendingar hafa sýnt áhuga eru byggingar- og matvara,“ segir í tilkynningu. 

Með þessari tímabundnu breytingu vonast Eimskip til að opna á frekari tækifæri með auknum sveigjanleika í siglingakerfinu en jafnframt góðri og áreiðanlegri þjónustu.

• Blogga um frétt