Ekki áður séð hnúfubak svo innarlega í firðinum

Guðni Albert Einarsson var á ferð inn Djúpið á sunnudagsmorgun er hann kom auga á hnúfubak á fullri ferð í firðinum sem hann myndaði með dróna. Guðni deildi síðan myndbandi af atvikinu á Facebook, en þar sést hvalurinn losa sig við einhverja hvíta flygsu.„Hverju skyldi hann vera að hrækja út úr sér, ætli það sé plastpoki. Mér dettur það helst í hug,“ segir Guðni í færslu sinni.

Í samtali við mbl.is segir Guðni hnúfubaka alltaf vera einhvers staðar á ferð í Djúpinu, „Ég hef nú samt ekki séð hann svona innarlega áður. Þetta var alveg inni í fjarðarbotni,“ segir hann. Hnúfubakurinn hafi verið alveg upp við land og sér hafi virst hann vera fullvaxinn, um 10-12 metrar á lengd. „Ég hef aldrei séð hann svona nálægt. Hann var alveg á fullri ferð, greinilega að veiða rækju eða eitthvað.“

Á myndbandinu sést hvar hvalurinn hrækir einhverju út úr sér og segir Guðni sér hafa dottið í hug að það gæti verið plastpoki. „Ég hef ekki rannsakað það nákvæmlega en það flaug í gegnum hausinn á mér. Greinilega var hann að velta sér svona til þess að hrækja þessu út úr sér og svo flaut þetta á eftir honum, þannig að það var ekki eins og þetta væri eitthvað þungt.“

Spurður hvort það sé ekkert mál að elta hvali með dróna segir hann það ekki alveg vandalaust. „Maður þarf að vera svolítið heppinn til að sjá hvar hann kemur upp, en hann var kominn svolítið grunnt, þannig að ég sá niður á hann,“ segir Guðni sem gerir nokkuð af því að taka drónamyndir í firðinum í kringum sig. Hann kveðst þó ekki hafa myndað hvali áður, en bæði seli og refi. 

• Blogga um frétt