Í dag eru allir á landleið

Kristmundur Kristmundsson, sem gerir út bátinn Lunda ST-11 til strandveiða frá Gjögri, segir veiðarnar í heild hafa gengið vel í sumar. „Þetta var svolítið þung byrjun en svo rættist úr þessu,“ segir Kristmundur og bætir við að einna best hafi tíðin verið á strandveiðunum fyrir norðan seint í ágústmánuði.

„Það hafa verið miklar brælur og bæði í júní og júlí voru menn kannski rétt að ná dögunum sínum á síðustu dögum mánaðarins. Þannig að það hefur verið svolítið erfitt að sækja þetta.“

Fyrirkomulagi strandveiða var breytt í vor og voru miklar áhyggjur af afleiðingunum á Ströndum, þar sem menn óttuðust að gengið yrði mikið á heildarpott aflaheimilda áður en þeir fengju almennilegar veiðar, þar sem fiskurinn gengur seint um sumarið á miðin undan Ströndum. Svartsýnustu spár manna rættust þó ekki, eins og Örn Pálsson, framkvæmdastjóri Landssambands smábátaeigenda, komst að orði hér fyrr í blaðinu.

Ná skammtinum fyrir hádegi

„Okkar martröð væri sú að heildarpotturinn kláraðist í júlí og við fengjum ekkert að veiða í ágúst,“ sagði Kristmundur í samtali við blaðamann í maí, eftir að frumvarpið tók gildi. Hann segir það ljóst nú að martröðin varð ekki að veruleika.

„Ég held að menn séu almennt mjög sáttir við nýja fyrirkomulagið, mönnum finnst þetta hafa tekist vel. Ég heyri ekki annað á mínum mönnum en að þeir séu harðánægðir með að geta róið út ágúst,“ sagði Kristmundur þegar mbl.is ræddi við hann á dögunum.

„Í dag eru allir bátar á landleið eða komnir í land, og voru komnir með skammtinn vel fyrir hádegi. Eru þá ekki að berjast við að ná þessu alla fjórtán klukkutímana sem má vera úti, þannig að það er vel. Fiskiríið er betra,“ segir hann. Spurður hvort mönnum finnist þá ef til vill eilítið súrt í broti að þurfa að leggja árar í bát í ágústlok, segir hann að svo sé vissulega.

„Menn hafa líka velt því fyrir sér hvort ekki megi gefa eftir nokkra daga í september, fari svo að heildarpotturinn klárist ekki. En það er nú bara svona bryggjuspjallið,“ segir hann kíminn.

10-14 bátar gerðir út

Í sumar hafa verið gerðir út á bilinu tíu til fjórtán bátar frá Norðurfirði að sögn Kristmundar. „Við höfum aldrei verið svona fáir áður í Norðurfirði, ekki nema bara fyrsta sumarið þegar við vorum að byrja. Þannig það er nóg pláss í höfninni hjá okkur, og sömuleiðis í flutningabílnum. En það er eins og það verði alltaf eitthvað til bjargar, hingað hefur komið einn og einn kvótabátur til að landa, sem hefur létt undir upp á flutninginn suður að gera. Mönnum verður alltaf eitthvað að vopni í baráttunni.“

Meiri ánægja hefur verið með fiskverðið en í fyrra. „En það er þó verri en árið þar áður, og miklu verra en árið 2015. En það er að minnsta kosti betra en í fyrra. Meðalverðið hefur komist eitthvað yfir 200 krónur hjá okkur í Norðurfirðinum, en var undir þeirri krónutölu í fyrra. En þetta litast ef til vill að því að við erum ekki mikið í stóra fiskinum, heldur frekar þessum millistóra.“