„Tortóla-dylgjum vísað til föðurhúsa“

Málflutningi lögmannsins Magnúsar Helga Árnasonar, er varðar úrsögn hans úr stjórn Vinnslustöðvar Vestmannaeyja er lýst sem „fráleitum og rakalausum“ í yfirlýsingu frá Sigurgeiri Brynjari Kristgeirssyni, sem skrifar fyrir hönd Vinnslustöðvarinnar og Morgunblaðið fékk senda.

Í frétt þann 29. nóvember í Morgunblaðinu segir Magnús Helgi að úrsögn sín úr stjórninni tengdist afstöðu annarra stjórnarmanna til tillögu hans þess efnis að stjórnin fæli endurskoðendum félagsins að kanna hvort Vinnslustöðin ætti í viðskiptum við fyrirtækið Gordon Trade Management LLP (GTM). Það sé eða hafi verið í eigu About fish Ltd., sem skráð er í skattaskjóli á eyjunni Tortóla og beri sama nafn og fimm félög í eigu Vinnslustöðvarinnar báru.

Segir í yfirlýsingu Vinnslustöðvarinnar að Magnúsi hafi verið svarað lið fyrir lið á stjórnarfundi þann 9. nóvember. „Málið var tekið sérstaklega fyrir á stjórnarfundi 9. nóvember 2018 þar sem fráleitum og rakalausum málatilbúnaði mannsins var svarað lið fyrir lið og m.a. upplýst um eignarhald eins og það var árið 2015. Þetta tiltekna félag, About fish Ltd. tengist Vinnslustöðinni eða eigendum hennar á engan hátt og hefur aldrei gert. Vinnslustöðin hefur hins vegar selt GTM fisk og sama hafa mörg önnur íslensk sjávarútvegsfyrirtæki gert,“ segir í yfirlýsingunni. Í tengslum við málið hefur GTM sent frá sér yfirlýsingu þess efnis að engir íslenskir ríkisborgarar hafi haft fjárhagslega hagsmuni af starfsemi þess.

Í yfirlýsingu VSV kemur einnig fram að Magnús Helgi hafi sagt sig úr stjórninni „vegna þess að enginn einasti hluthafi í félaginu kærði sig um að hann sæti þar áfram. Við manninum blasti að fá á sig vantraust á hluthafafundi í VSV. Hann kaus þá að láta sig frekar hverfa strax en reynir nú að tengja VSV við Tortóla til að draga athygli frá raunverulegum ástæðum úrsagnarinnar.“

Frétt af mbl.is

Vildi láta kanna tengsl við Tortóla-félag