Besti mánuður í sögu Gullvers

Ísfisktogarinn Gullver NS kom til Seyðisfjarðar á sunnudag með fullfermi eða rúmlega 107 tonn eftir fjóra daga á veiðum, en þegar rýnt er í aflatölur og verðmæti Gullvers í maímánuði hefur afli verið afar góður, eða 770 tonn að verðmæti um 175 milljónir króna.

Það eru án efa mestu verðmæti í einum mánuði í sögu skipsins, að því er kemur fram í tilkynningu frá Síldarvinnslunni.

Gullver landaði alls sjö sinnum í maí, en á aflinn, sem landað var á Seyðisfirði á sunnudag, var mjög blandaður af ufsa, þorski, gullkarfa og djúpkarfa. Að sögn Rúnars L. Gunnarssonar skipstjóra eru menn ánægðir með aflabrögðin upp á síðkastið og gera sér vonir um að áframhald verði á þeim, en gert er ráð fyrir að Gullver fari í slipp í lok júní eða að afloknum næstu þremur veiðiferðum.

• Blogga um frétt