Telur þorskinn vega á móti ýsunni

„Það er mjög jákvætt að sjá þessa þriggja prósenta aukningu í þorskinum. Á móti því kemur síðan lækkun í ýsunni,“ segir Kristján Þór Júlíusson, landbúnaðar- og sjávarútvegsráðherra, í samtali við mbl.is um ráðgjöf Hafró fyrir fiskveiðiárið 2019/2020.

„Í því sambandi er sjálfsagt að hafa í huga að hún (ýsan) hækkaði mikið í fyrra,“ segir ráðherrann og bendir á að ráðlagt aflamark ýsu nú vera svipað og var fyrir tveimur árum.

Frétt af mbl.is

Lækka aflamark ýsu um 28%

Hafró kynnti í morgun ráðgjöf sína vegna fiskveiðiársins 2019/2020. Þar kom fram að lagt sé til að lækka aflamark ýsu og fleiri tegunda, en hækka á aflamark þorsks í rúm 272 þúsund tonn.

Áhyggjur af nýliðunarbresti

„Helsta áhyggjuefnið er nýliðunarbrestur sem við erum að sjá í tegundum, sérstaklega gullkarfa og skötusel. Þetta er eitthvað sem við þurfum að fylgjast grannt með,“ segir hann.

Kristján þór Júlíusson. mbl.is/Kristinn Magnússon

Þá kveðst Kristján Þór ánægður með að það virðist hafa myndast „ákveðið jafnvægi í nytjastofnunum okkar sem hafa stækkað undanfarin ár. Samhliða þeim vexti hefur veiðiálagið minnkað.“

Spurður hvaða áhrif aflamarksbreytingarnar á árinu muni hafa á útflutningstekjur, svarar Kristján Þór að ekki liggi fyrir nánari úttekt um áhrif breytinganna. Þó telur hann að hækkun aflamarks á þorski vegi upp á móti lækkun aflamarks ýsunnar.

• Blogga um frétt