Heitur pottur í lykilhlutverki

Togarinn Blængur NK kom til hafnar í Neskaupstað um helgina eftir 26 daga veiðiferð. Aflinn í veiðiferðinni var 534 tonn upp úr sjó, mest ýsa og ufsi, að verðmæti 192 milljónir króna. Fyrstu dagar veiða voru fyrir austan land og síðan haldið vestur og mest veitt á Halanum og Deildargrunni, er haft eftir Theodór Haraldssyni skipstjóra á vef Síldarvinnslunnar.

Á vef félagsins er bent á að fáar konur séu í áhöfnum íslenskra togara en að í þessari veiðiferð hafi þær verið tvær. Lísa Margrét Rúnarsdóttir, sem er 21 árs, var að fara í sína þriðju veiðiferð á Blængi og Elísabet Líf Theodórsdóttir var að fara í sína fyrstu veiðiferð, en hún er 18 ára.

Báðar segjast ánægðar með starfið þótt því kunni að fylgja áskoranir.

Blængur NK í höfn í Neskaupstað. Ljósmynd/Hákon Ernuson

„Stundum er [vinnan í vinnslunni] einhæf og dálítið erfið. Það getur tekið á að standa í átta tíma og snyrta ýsu. En þetta eru störf sem allir um borð vinna af metnaði – allir leggjast á eitt um að vinna vel og ná sem mestum verðmætum út úr aflanum,“ er haft eftir Lísu Margréti sem er á leið til Slóvakíu í læknisnám.

„Fyrstu dagarnir voru dálítið erfiðir og ég var smásjóveik en sjóveikin rjátlaðist fljótt af mér og þá varð allt betra. Ég vann allan túrinn við snyrtingu á fiski og það er dálítið einhæf vinna og þreytandi og því mikilvægt að geta slappað af á frívöktum og þar gegnir heiti potturinn um borð lykilhlutverki,“ er haft eftir Elísabetu Líf, sem er nú á þriðja ári á náttúrufræðibraut í Verkmenntaskóla Austurlands.

Báðar segja þær heitapottinn um borð gegn lykilhlutverki svo hægt sé að slaka á eftir erfiðisvinnu. Jafnframt kváðust þær ánægðar að vera tvær um borð innan um 24 karlmenn, ekkert væri yfir þeim að kvarta.

• Blogga um frétt