Sjávarútvegssýningin flytur til Barselóna

Stærsta sjávarútvegssýning heims mun verða haldin í síðasta sinn í Brussel í Belgíu á næsta ári, en þar hefur Seafood Expo Global/Seafood Processing Global verið haldin frá árinu 1993. Diversified Communications sem rekur sýninguna hefur ákveðið að flytja hana til Barselóna á Spáni og verður hún haldin í Fira de Barcelona-byggingunni í fyrsta sinn árið 2021.

Sýningin hefur stöðugt stækkað og hafa um tvö þúsund fyrirtæki frá um 90 löndum tekið þátt. Þá hafa um 29 þúsund kaupendur og seljendur sótt ráðstefnuna árlega, að því er fram kemur á vef Diversified Communications. Þar segir að ákvörðun um flutning sýningarinnar hafi verið tekin í kjölfar þess að ljóst varð að þörf væri á stærra og nútímalegri húsnæði undir hana.