Jöfn og góð síldveiði

Jöfn og góð síldveiði hefur verið fyrir austan land undanfarið. Skipin voru framan af vertíð í Héraðsflóa, en síldin hefur fært sig utar síðustu daga.

Síldin hefur verið stór og hráefnið hið besta til manneldisvinnslu. Gott veður hefur yfirleitt verið á miðunum frá því að síldin tók við af makrílnum og stutt á miðin frá austfirskum höfnum.

Víkingur AK, skip Brims hf., var í byrjun vikunnar dreginn frá Vopnafirði til Akureyrar þar sem skipið fer í slipp. Við skoðun vélstjóra um borð í Víkingi, er skipið var inni á Vopnafirði um helgina, sá hann stóra sprungu í tengi á milli skrúfuöxuls og gírs. Ekki var talið hættandi á að sigla skipinu til viðgerða á Akureyri og var Grettir sterki, skip Togskipa, fenginn til að draga Víking. Það gekk mjög vel þó svo að verulegur stærðarmunur sé á skipunum.

Skipið verður öxuldregið á Akureyri og nýjum tengslum komið fyrir. Búist er við að viðgerð ljúki eftir um tvær vikur.