Þorskurinn á Vestfjarðamiðum vandveiddari en oft áður

„Við erum á leiðinni norður á Vestfjarðamið eftir að hafa tekið karfa- og ufsaskammtinn á okkar heimaslóðum. Markmiðið nú er að veiða þorsk. Það er reyndar bræla á Vestfjarðamiðum núna en veðrið á að ganga niður og vonandi verður komið ágætisveiðiveiður þegar við komum á svæðið.“

Þetta er haft eftir Friðleifi Einarssyni, skipstjóra á Helgu Maríu AK, á vefsíðu Brims en rætt var við hann fyrr í dag. Veiðiferðin hófst að hans sögn á Fjöllunum suðvestur af Reykjanesi. Þar hafi þeir verið í hálfan annan sólarhring.

„Tókum ein tíu hol sem skiluðu um 75 tonna afla og þar með vorum við komnir með karfa- og ufsaskammtinn sem okkur var ætlaður. Gullkarfastofninn stendur sterkur en það er erfiðara að segja til með ufsann. Ufsinn er brellinn, kemur og fer en ef maður er á réttum stað á réttum tíma er hægt að fá mjög góða veiði.“

Þorskurinn á Vestfjarðamiðum er vandveiddari nú en oftast áður að hans sögn. „Hann virðist koma og fara. Veiðin getur blossað upp einn daginn en svo er ekkert að hafa þann næsta. Almennt séð virðist þorskurinn hafa færst austar og skipin hafa gjarnan farið af Halanum austur á Strandagrunn í leit sinni að þorski. Svo er einhver þorskveiði úti fyrir Norðurlandi en skipin eru svo fá að það er erfitt að átta sig á útbreiðslunni.“

Reiknar hann með því að vera kominn á veiðislóðina í nótt. Sennilega byrji hann veiðar í kantinum norðan við Víkurálinn og vinni sig norður eftir og endi á Halanum. Aflabrögð og veðrátta muni hins vegar ráða mestu um framhaldið.

• Blogga um frétt