Steinunn SF 10, nýr togbátur í skipastól Skinneyjar-Þinganess, kom til Hafnar á Hornafirði í dag. Fjölmenni tók á móti skipinu og á eftir bauðst fólki að koma um borð og skoða gripinn.
Togbáturinn nýi er einn sjö slíkra sem smíðaðir eru hjá Vard í Brattvaag í Noregi og hafa verið að tínast til landsins að undanförnu. Úr þessum flota fara tveir bátar til Skinneyjar- Þinganess; það systurskipin Steinunn SF og Þinganes SF, en það síðarnefnda er væntanlegt til til landsins 21. desember næstkomandi.
Nýju skipin sjö eru litlir togarar, lengdin tæpir 30 metrar, breiddin 12 metrar og stærðin 611 brúttótonn. Íbúðir eru fyrir 13 manns og lestin tekur 80 tonn af fiski. „Steinunn SF fer til Hafnarfjarðar einhvern næstu daga þar sem sett verður um borð vinnslulína og ýmis annar búnaður. Báturinn fer svo í útgerð sennilega í byrjun febrúar næstkomandi,” segir Ásgeir Gunnarsson framkvæmdastjóri veiða hjá Skinney-Þinganesi.
Skipstjóri á Steinunni SF verður Erling Erlingsson og Þorgils Snorrason er aðalvélstjóri.
Tilkomu nýju skipanna tveggja fylgir að tveir bátar sem fyrir voru, það er gamla Steinunn og gamla Hvanney, verða seldir til Nesfisks hf. í Garði. Þá hefur Þinganesið SF verið sett á söluskrá. Því fækkar um eitt skip í flota félagsins. Þessu fylgir ennfremur að bolfiskveiðiskip Skinneyjar-Þinganess verða í framtíðinni fyrst og síðast á togveiðum en hætt verður að sækja á miðin með snurvoð og netum.
Ásgeir Gunnarsson framkvæmdastjóri veiða hjá Skinney Þinganesi, til vinstri, og Ingvaldur Ásgeirsson einn af eigendum fyrirtæksins. Margrét Ásgeirsdóttir til vinstri.
Ljósmynd/Sverrir Aðalsteinsson
Horft í land með myndavélum skipsins. Skreiðarskemmurnar við höfnina til vinstri á skjánum.
Ljósmynd/Sverrir Aðalsteinsson
Ljósum prýtt skip í heimahöfn.
Ljósmynd/Sverrir Aðalsteinsson