„Öskrað eftir fiski á erlendum mörkuðum“

„Það er mjög mikill skortur,“ segir Aron Baldursson, framkvæmdastjóri Fiskmarkaðar Íslands, í samtali við 200 mílur um stöðuna á fiskmörkuðum. Verð hefur verið í hæstu hæðum undanfarna daga og hefur meðalverð á þorski farið hæst í um 550 krónur kílóið og fyrir stóra fiska í 680 upp undir 700 krónur, að sögn Arons.

„Þetta eru ofboðslega há verð,“ segir hann og tekur fram að stöðuna á markaði óvenjulega.

Spurður hvort veðurfarið hafi haft áhrif á hráefnisskortinn svarar hann: „Já. Það er bæði veður og veiðar, það virðist erfitt að sækja þessa fiska þegar tækifæri gefst til þess. Náttúran spilar stóran þátt.“ Hann segir hinsvegar engan vera að „fara á taugum“ vegna ástandsins og að veðrið hljóti að batna á næstunni.

Það er hins vegar ekki einungis aðstæður hér á landi sem valda háu verði, að sögn framkvæmdastjórans. „Skorturinn úti er alveg rosalegur, það er alveg öskrað eftir fiski á erlendum mörkuðum og það skilar sér alla leið fyrir markaðinn. Svo verður ennþá meiri spenna þegar kemur ekkert að landi og enginn kemst á sjó. Þetta eru allt samverkandi þættir,“ útskýrir Aron.

• Blogga um frétt