Ágætar veiðar á Kötlugrunni og út af Ingólfshöfða

Ísfisktogarinn Smáey VE landaði fullfermi eða 70 tonnum í Vestmannaeyjum í morgun. Aflinn var blandaður en mest var af karfa, ufsa og þorski, að því er segir á vef Síldarvinnslunnar.

„Við byrjuðum á Kötlugrunni og enduðum út af Ingólfshöfða. Það gekk ágætlega að veiða og þetta var stuttur túr, einungis þrír sólarhringar. Núna er gott veður, norðanátt og sléttur sjór, en hann spáir brælu á föstudag og laugardag. Við erum orðnir vanir brælum, allur janúar var vægast sagt hundleiðinlegur,“ er haft eftir Birgi Þór Sverrissyni skipstjóra.

Smáey í höfn í Vestmannaeyjum Ljósmynd/Síldarvinnslan/Guðmundur Alfreðsson

Hann segir að sést hafi til vertíðarfisks en hann sé „ekki kominn af neinum krafti. Hann hefur verið tiltölulega seint á ferðinni síðustu árin. Ég held að hann verði kominn fyrir alvöru eftir tvær til þrjár vikur. Höfnin hér í Vestmannaeyjum er full af síld núna og það virðist vera töluvert af síld við Eyjar. Síldinni fylgir mikið fuglalíf og það er tignarlegt að sjá súlurnar og skarfana sækja sér síld í matinn. Þetta er mikið sjónarspil,“ segir Birgir Þór.

Smáey er nú mönnuð af áhöfn Vestmannaeyjar, en hún er á Akureyri þar sem unnið er að lagfæringum á millidekki. Birgir Þór kveðst gera ráð fyrir að framkvæmdum við skipið verði lokið um miðja næstu viku.

Vestmannaey VE-54 kom til landsins í júlí. Ljósmynd/Þorgeir Baldursson

• Blogga um frétt