Vara við hafís undan Vestfjörðum

Við eftirlit varðskipsins Þórs kom áhöfnin auga á hafís sem var rétt utan við Halann og varar nú Landhelgisgæslan við hafís undan Vestfjörðum sem rekur hratt til suðsuðvesturs og sést illa á ratsjá, að því er fram kemur í tilkynningu. Þar segir að ísbrúnin hafi legið í norðaustur og klukkan fjögur í gær var ísinn næst landi um 43 sjómílur norðvestur af Straumnesi.

Haft er eftir Halldóri Nellet, skipherra á Þór, að ísinn sé tættur enda norðlægar áttir á svæðinu. Varðskipið Þór fylgdi ísröndinni eftir og má má finna íshrafl og ísmola utan svæðisins.

Mynd/Landhelgisgæslan

„Veður og vindar voru með þeim hætti Landhelgisgæslunni þótti líklegt að hafís væri á svæðinu og gæti rekið hratt að landi. Þá var gripið til þess ráðs að leita til Ingibjargar Jónsdóttur, hafísfræðings hjá Veðurstofunni, sem brást skjótt við og veitti Landhelgisgæslunni afar góðar gervitunglamyndir sem nýttust áhöfninni á Þór vel við hafíseftirlitið,“ segir í tilkynningunni.

Ljósmynd/Landhelgisgæslan

• Blogga um frétt