Vinnustöðvun áhafnar Herjólfs hefst á miðnætti

Tímabundin vinnustöðvun skipverja á Herjólfi hefst á miðnætti í kvöld og stendur í einn sólarhring. Þetta var staðfest í kvöld þegar Félagsdómur hafnaði kröfu Samtaka atvinnulífsins, fyrir hönd Herjólfs ohf. um að dæma boðaða vinnustöðvun ólögmæta.

„Vinnustöðvunin var boðuð fyrir rúmri viku síðan en Herjólfur ohf., sem er í eigu Vestmannaeyjabæjar, ákvað að fara með málið fyrir Félagsdóm og freista þess að fá boðuninni hnekkt. Það kom úrskurður klukkan sjö eða átta í kvöld um það að vilji Herjólfs ohf. næði ekki fram að ganga,“ segir Jónas Garðarsson, formaður samninganefndar Sjómannafélags Íslands, í samtali við mbl.is.

Frétt af mbl.is

Kjör séu ákveðin og verkfall því ólögmætt

Veit ekki hvort þetta sé vilji bæjarbúa og bæjarstjóra

Jónas segist ánægður með niðurstöðu Félagsdóms og vonast til að nú fari samningaviðræður að komast á skrið.

„Vonandi fæst þetta fólk sem vinnur hjá fyrirtæki bæjarins til að tala við okkur. Það hefur ekki fengist til þess í núna á annað ár. Ég veit ekki hvort það er með vilja bæjarbúa og bæjarstjóra,“ bætir hann við.

Frétt af mbl.is

„Þeir hafa ekki viljað ræða við okkur“

Um 20 starfsmenn er að ræða, háseta, bátsmenn og þjónustufólk og mun Herjólfur ekki sigla á meðan vinnustöðvunin stendur yfir.

Önnur vinnustöðvun er boðuð eftir viku, frá miðnætti 14. júlí og mun hún standa yfir í þrjá sólarhringa. Þriðja vinnustöðvunin verður svo frá miðnætti 28. Júlí og mun hún standa yfir í þrjá sólarhringa.

Frétt af mbl.is

Hluti áhafnar Herjólfs boðar verkfallsaðgerðir

Fréttin var uppfærð.

• 1 blogg um fréttina

Bloggað um fréttina

• Helgi Þór Gunnarsson: Hinn innri maður!?