Heildartekjur námu 280 milljörðum

Heildartekjur í sjávarútvegi námu 280 milljörðum króna í fyrra og jókst framlegð hlutfallslega úr 22% í 26%. Hagnaður eykst einnig úr 27 milljörðum króna í rúma 43 milljarða króna.

Þetta kemur fram í kynningu frá Deloitte á Sjávarútvegsdeginum 2020, sem fór fram í dag. Niðurstaðan byggist á ársuppgjörum fyrirtækja sem hafa yfir að ráða tæplega 90% af úthlutuðu aflamarki og er skalað upp í 100%.

Frétt af mbl.is

Árangurinn sé litinn hornauga

Fjárhæð veiðigjalds fór úr 11,3 milljörðum króna í 6,6 milljarða króna.Viðmiðunarár við veiðigjald 2019 var árið 2017, en í kynningunni kom fram að afkoma í fiskveiðum árið 2017 hafi verið óviðunandi. Það ár námu heildartekjur í jávarútvegi aðeins 235 milljörðum króna.

Reiknaður tekjuskattur hækkaði um 50% úr 6 milljörðum króna í 9 milljarða króna. Arðgreiðslur námu 10,7 milljónum króna, borið saman við 12,3 milljarða króna árið 2018.

Góður gangur var í fiskeldi á Íslandi í fyrra. Tekjur námu þar tæpum 30 milljörðum króna og framleitt magn jókst úr rúmum 19 þúsund tonnum í 34 þúsund tonn. Útflutningsverðmæti nánast tvöfaldaðist, jókst frá fyrra úr rúmum 13 milljörðum króna í 25 milljarða.

Frétt af mbl.is

Upptaka frá Sjávarútvegsdeginum 2020

Eitt útilokar ekki annað

„Það er mjög ánægjulegt að sjá hvað íslenskur sjávarútvegur stendur traustum fótum í þeim ólgusjó sem þjóðarskútan nú siglir,” sagði Heiðrún Lind Marteinsdóttir, framkvæmdarstjóri SFS á fundinum.

Það er ýmislegt sem skýrir þessa niðurstöðu, en stærstan þátt eiga íslensku sjávarútvegsfyrirtækin sjálf sem eru vakin og sofin við að auka verðmæti afurða með ýmsu móti og í þrotlausri vinnu við að bæta virðiskeðjuna, allt frá skipulagi veiða til lokasölu,” bætir hún við.

Þá segir hún ánægjulegt að fiskeldið skuli vera að festa sig í sessi sem traust útflutningsgrein og að afkoman í fyrra gefi góð fyrirheit.

Hér á landi þurfa að þrífast fjölbreyttar, gjaldeyrisskapandi útflutningsgreinar og eitt útilokar ekki annað í þeim efnum.“

• Blogga um frétt