„Við erum gjörsamlega gáttaðir“

Báturinn Drangur ÁR 307 sem sinnt hefur sæbjúgnaveiðum út af Austurlandi sökk nær fyrirvaralaust í höfninni á Stöðvarfirði, upp úr klukkan sjö í gærmorgun.

Frétt af mbl.is

Aðeins stefnið stendur upp úr

Steinar Sigurgeirsson, starfandi skipstjóri á bátnum, segir að mikið hafi verið lagt í bátinn til þess að gera hann færan til sæbjúgnaveiða. Hann kom til Stöðvarfjarðar í gærkvöldi til að kanna aðstæður. Með honum í för var kafari á vegum tryggingafélagsins TM sem ætlaði að fara niður að bátnum í gærkvöldi. Að sögn Steinars eru allar líkur á því að báturinn sé ónýtur. „Þetta kemur sér mjög illa því vertíðin var í raun nýhafin. Hún hófst 1. september.“

Eigandi bátsins er fyrirtækið Aurora Seafood hf. Davíð Freyr Jónsson, framkvæmdastjóri fyrirtækisins, segir að þetta hafi komið mjög á óvart. „Við erum algjörlega gáttaðir,“ segir Davíð. Hann segir að skipið hafi staðið í höfninni á Stöðvarfirði síðan um miðja síðustu viku. Nú sé unnið að því að koma í veg fyrir mengunarhættu og stefnt sé að því að hífa skipið upp eins fljótt og mögulegt er.