Hafa komið með afla fyrir 500 milljónir

Það hafa heldur betur verið með ágætum aflabrögðin hjá áhöfninni á Sandfelli SU 75, ekki bara var báturinn aflamesti línubáturinn en hann hefur það sem af er ári komið með tvö þúsund tonnum að landi að verðmæti 500 milljónum króna.

Sagt er frá áfanganum í færslu á vef Loðnuvinnslunnar, sem gerir Sandfellið út. Hjá fyrirtækinu hefur skapast hefð fyrir því að fagna þegar slíkum áföngum er náð. „Það er dýrmætt þegar lífið getur gengið sinn vanagang. Ef síðustu misseri hafa kennt okkur eitthvað þá er það einmitt það. Á Sandfellinu sækja menn sjóinn rétt eins og þeir hafa gert til margra ára og það hefur gengið vel,“ segir í færslunni.

Frétt af mbl.is

Fellin gerðu það gott í október

Fyrirtækið hélt í hefðina og færði áhöfnum og öðrum starfsmönnum köku til að fagna árangrinum. Þá segir að Rafn Arnarson skipstjóri á Sandfelli var að vonum sáttur og glaður með viðurkenninguna og kökuna. „Ég var bara einn um borð þegar kakan kom, strákarnir voru að sinna verkefnum annars staðar og ég þurfti að taka mig á að geyma kökuna þangað til þeir komu til baka.“

„Margir túrar, frábær beita, góðar áhafnir, svo eitthvað sé nefnt,” svaraði Rafn er hann var spurður hverju væri að þakka að svona vel hafi gengið.

Á Sandfelli eru tvær fjögurra manna áhafnir sem vinna tvær vikur í senn.

Áhafnarmeðlimir á Sandfelli kváðust ánægðir með kökuna. Ljósmynd/Loðnuvinnslan

• Blogga um frétt