Sjávarútvegsdagurinn verður haldinn í Hörpu á ný

Guðni Th. Jóhannesson, forseti Íslands, er meðal þeirra sem munu flytja erindi á sjávarútvegsdeginum sem fram fer í Hörpu þriðjudag í næstu viku. Nefnist erindi forsetans: „Hin heimskulega og skammsýna rányrkjustefna verður að víkja“ – Fimmtíu ára sjónarmið í fullu gildi.

Sjávarútvegsdagurinn er samstarf Deloitte, Samtaka fyrirtækja í sjávarútvegi og Samtaka atvinnulífsins og er yfirskrift dagsins að þessu sinni: „Vel í stakk búinn“. Fram kemur á vef Samtaka fyrirtækja í Sjávarútvegi að yfirskriftin vísi „til þess að bæði sjávarútvegur og fiskeldi komust nokkuð klakklaust í gegnum erfitt ár í fyrra og greinarnar eru vel í stakk  búnar til þess að takast á við framtíðina.“

Heiðrún Lind Marteinsdóttir, framkvæmdastjóri SFS, fun setja ráðstefnuna og annast fundastjórn en auk Guðna munu þau Hildur Hauksadóttir, sérfræðingur í umhverfismálum hjá SFS, og Jónas Gestur Jónasson, löggildur endurskoðandi hjá Deloitte, flytja erindi. Hildur um samspil sjávarútvegs og loftslagsmála en Jónas Gestur um afkomu sjávarútvegs og fiskeldis 2020.

Sjávarútvegsdagurinn verður einnig í beinu streymi.

• Blogga um frétt