Framleiðsla í fiskeldi minnkaði heldur á nýliðnu ári frá árinu á undan. Mest munar um 1.500 tonna samdrátt í sjóeldi. Stafar það af áföllum vegna veirusýkingar á Austfjörðum og óveðurs í Dýrafirði. Mikið er af seiðum í eldi og má búast við að laxeldið rjúfi 50 þúsund tonna múrinn á þessu ári.

Slátrað var nærri 45 þúsund tonnum af laxi í fyrra sem er um 1.500 tonnum minna en árið 2021. Samdrátturinn samsvarar rúmum 3%. Er þetta í fyrsta skipti í allmörg ár sem framleiðsla í laxeldi eykst ekki en eldið hefur aukist hratt á síðustu árum.

Ástæðurnar fyrir því að framleiðslan jókst ekki eru tvær. Annars vegar setti ISA-veiran strik í reikninginn hjá Ice Fish Farm á Austfjörðum svo slátra þurfti öllum laxi úr kvíum fyrirtækisins. Hins vegar varð fyrirtækið Arctic Fish fyrir tjóni vegna óveðurs í Dýrafirði og þurfti að flýta slátrun úr kvíum þar.

Meira var sett út af seiðum í fyrra en áður. Það skilar sér í aukinni framleiðslu í ár og sérstaklega á næsta ári. Jafnvel er búist við að framleiðslan nái 50 þúsund tonna markinu í ár. Vandræðin sem urðu hjá Ice Fish Farm á síðasta ári hafa þó einnig áhrif í ár. 

Lesa má meira um málið í Morgunblaðinu í dag. 

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir