Bakkafoss verður í Ameríkusiglingum

Bakkafoss, nýtt gámaskip í þjónustu Eimskips, kom í fyrsta sinn til Reykjavíkur á mánudaginn. Það á að sigla á Norður-Ameríkuleið félagsins og lagði af stað í sína fyrstu ferð í gær. Nú eru 15 flutningaskip í siglingum fyrir Eimskip.

Tilkynnt var í mars sl. að Eimskip og Ernst Russ AG í Þýskalandi hefðu, í gegnum félagið Elbfeeder Germany, keypt 1.025 gámaeininga skip. Skipið var smíðað árið 2009. Það er 11.550 brúttótonn og í áhöfn eru 14 manns, allt útlendingar. Hlaut það nafnið Bakkafoss og verður sjötta skipið í sögu félagsins sem ber það nafn.

Frétt af mbl.is

Eimskip kaupir nýjan Bakkafoss

Sagði í tilkynningu Eimskips að með kaupunum stækki fyrirtækin enn frekar vel samsett eignasafn sitt í gámaskipum. Nú eru sjö gámaskip í sameiginlegri eigu félaganna í gegnum fyrirtækin Elbfeeder og Feederstar. Eimskip hyggst leigja skipið.

Eimskip á tæplega helmingshlut í félaginu Elbfeeder Germany sem er félag utan um rekstur gámaskipa. Ernst Russ AG er skipaeigandi sem skráður í Þýskalandi. Eimskip á ekki hlut í því félagi.