Fólkið bak við sjómennina

„Við byrjuðum á þessu í fyrra, ég í samstarfi við 66 gráður norður, að búa til stuttmyndir í tilefni sjómannadagsins. Í fyrra gerði ég mynd um pabba minn sem var að hætta á sjónum og hún vakti mikla lukku,“ segir Björn Steinbekk, ljósmyndari og kvikmyndagerðarmaður, í samtali við mbl.is um verkefni á borð við stuttmyndina um Agnesi og Jóhann í Neskaupstað en Agnes er sjómannsfrú og gegnir þar með hlutverki sem að sögn Jóhanns er ekki fyrir hvern sem er.

„Ég er sjálfur kominn af sjómönnum og var á sjónum í gamla daga. Ég er búinn að vera að mynda mikið tengt sjávarútvegi síðustu átján mánuði og þá kviknaði þessi hugmynd, að búa til myndir um konurnar bak við sjómennina og fjölskyldulíf sem er svolítið öðruvísi en gerist og gengur,“ heldur Björn áfram.

Hann segir efnið áhugavert og sé þar í raun kominn óður til fólksins á bak við sjómennina, „að sýna því athygli og benda svolítið á hvernig þeirra líf er. Það var svona hugmyndin á bak við þetta,“ segir Björn og hér fyrir neðan má sjá afraksturinn.

• Blogga um frétt