8,6 milljarða hagnaður á 9 mánuðum
Setja bókamerki
Hagnaður Síldarvinnslunnar á þriðja ársfjórðungi nam rúmlega 20,1 milljónum bandaríkjadala sem er jafnvirði um 2.800 milljóna íslenskra króna. Hagnaður félagsins á fyrstu níu mánuðum ársins var 62,8 milljónir bandaríkjadala sem eru rúmlega 8.600 milljónir íslenskra króna.
Þetta má lesa í færslu á vef Síldarvinnlunnar þar sem greint er frá uppgjöri ársfjórðungsins.
Það segir að makrílveiðin hafi að mestu farið fram innan lögsögunnar og hafi gengið vel. Einnig gengu veiðar á norsk-íslenskri síld vel og var stutt að sækja aflann. Sala á uppsjávarafurðum hefur gengið vel en minni umsvif voru í bolfiskveiðum- og vinnslu vegna sumarleyfa og kvótstöðu. Þá hefur orðið þó nokkur hækkun á kostnaðarliðum.
Alls námu rekstrartekjur 106,8 milljónum bandaríkjadala á þriðja ársfjórðungi en tekjurnar voru 317,9 milljónir dalir á fyrstu níu mánuðum.
Heildareignir samstæðu Síldarvinnslunanr eru metnir á rúman milljarð bandaríkjadala eða tæplega 150 milljarða íslenskra króna.
Óvissa vegna jarðhræringa
„Jarðhræringar á Reykjanesi hafa stöðvað tímabundið bolfiskvinnslu félagsins í Grindavík. Starfsmönnum hefur tekist að bjarga öllum verðmætum sem bundin voru í birgðum og hluta lausafjár. Engar sjáanlegar skemmdir hafa komið í ljós á eignum félagsins og enn sem komið er hefur ekki orðið vart við umfangsmikið tjón utan rekstrarstöðvunar bolfiskvinnslunnar,“ segir Gunnþór Ingvason, forstjóri Síldarvinnslunnar í færslunni.
„Mikil óvissa hefur ríkt hjá starfsfólki Vísis eins og öllum íbúum Grindavíkur frá því að jarðhræringarnar hófust. Því hefur verið lögð áhersla á að halda samskiptum við starfsfólk og styðja það með upplýsingagjöf eins og frekast er kostur.“
Hann segir ekki útséð hvert endanlegt tjón félagsins verður þar sem mikil óvissa er hver framvindan verður, en vísbendingar séu um að hættan í Grindavík sé á undanhaldi og að hægt verði að hefja undirbúning að því að koma vinnslu Vísis af stað á ný.
„Heilt yfir er uppgjörið gott og í takt við væntingar félagsins. Aukið vægi bolfisksheimilda og fjárfestingar síðustu ára jafna út sveiflur á milli tegunda. Þrátt fyrir ýmsar áskoranir er félagið með sterkan efnahag og fjölbreyttan rekstur til að takast á við framtíðina. Sem fyrr hefur Síldarvinnslan lagt áherslu á fjárfestingar til að þjóna viðskiptavinum sínum betur en aðeins með fjárfestingu í greininni er sjávarútvegurinn í stakk búinn að verja samkeppnisforskot sitt á alþjóðlegum mörkuðum,“ segir Gunnþór.
Umboðsmaður barna krefur ráðherra um svör
Segir afsökun Microsoft lélega
Afhendir yngri kynslóðum keflið
Dagbjört dæmd í 10 ára fangelsi fyrir líkamsárás
Stafræna byltingin étur börnin sín
„Þú ert bara orðin miðaldra kona“