„Algjört mok“ á gráa svæðinu við Færeyjar

„Þetta var í sannleika sagt rosaleg veiði, algjört mok,“ segir Tómas Kárason, skipstjóri á Beiti NK, í færslu á vef Síldarvinnslunnar. Skipið kom til hafnar á Seyðisfirði í gær með 2.950 tonn af kolmunna.

„Við fengum aflann á gráa svæðinu suðvestur af Færeyjum og það var aldrei dregið nema í 8 – 12 tíma. Þetta voru sex hol. Við fengum tvö 600 tonna hol, tvö 500 tonna, eitt var 390 tonn og eitt 360. Það var mikið að sjá af fiski á stóru svæði og þetta er hinn fallegasti fiskur, ábyggilega gott hráefni fyrir verksmiðjuna. Þar með er kolmunnaævintýrinu lokið að sinni en við gerum allt eins ráð fyrir að halda til kolmunnaveiða á ný eftir áramót. Svo bíða auðvitað allir spenntir eftir niðurstöðu frekari loðnuleitar,“ segir Tómas.

Á undanförnum dögum hefur fiskimjölverksmiðju Síldarvinnslunnar á Seyðisfirði borist yfir sjö þúsund tonn af kolmunna. Vilhelm Þorsteinsson EA kom fyrstur með um 2.500 tonn, síðan kom Barði NK með rúmlega 2.100 tonn og nú Beitir með 2.950 tonn.

• Blogga um frétt