Færeyingar með Íslandsmet

Íslandsmet er sagt hafa verið slegið á Eskifirði á sunnudag þegar færeyska uppsjávarskipið Christian í Grótinum landaði á sunnudaginn 3.653 tonnum af kolmunna úr einni veiðiferð. Er þetta talið stærsti farmur sem fiskiskip hefur landað í íslenskri höfn og jafnframt sá stærsti sem Christian í Grótinum hefur komið með í einni veiðiferð.

Fram kemur í færslu á Facebook-síðu Eskju að aflinn hafi verið við vigtun nákvæmlega 3.652.803 kíló og fyllti hann alla hráefnistanka Eskju af kolmunna.

Færði Eskja í tilefni þessa merka áfanga áhöfn skipsins myndarlega köku.

Fram kemur að löndunin hafi gengið vel en það tók innan við sólarhring að landa aflanum, segir í færslunni. 

Christian í Grótinum landaði 3.653 tonnum af kolmuna og er það líklegast Íslandsmet í löndun úr einni veiðiferð. Ljósmynd/Gungör

Skipið, Christian í Grótinum er eitt það allra stærsta og fullkomnasta uppsjávarskip sem til er og var byggt 2022 í Karstensens skipasmíðastöðinni í Danmörku og er 83,5 metrar að lengd og 17 metrar á breidd.

Að þessum risafarmi Christians meðtöldum hefur Eskja tekið á móti 28 þúsund tonnum af kolmunna frá áramótum. Þar af er helmingur hráefnisins keyptur af færeyskum og norskum skipum.

• Blogga um frétt