„Þetta gekk heldur brösuglega framan af“

„Við vorum mest í Hvalbakshallinu og á Hvalbaksgrunni. Þetta gekk heldur brösuglega framan af en úr þessu rættist í restina. Við fengum mjög gott skot í lok túrsins,“ segir Hjálmar Ólafur Bjarnason skipstjóri á ísfisktogaranum Gullver NS í færslu á vef Síldarvinnslunnar um síðasta túr skipsins.

Gullver landaði 85 tonnum á Seyðisfirði í gær og var aflinn nánast eingöngu ýsa og þorskur.

„Fiskurinn sem þarna fékkst er mjög góður og ætti að henta vel fyrir vinnsluna. Þorskurinn í Hvalbakshallinu var fullur af loðnu en við urðum hins vegar ekki varir við neinar loðnutorfur. Líklega er loðnan mjög dreifð á þessu svæði,“ segir Hjálmar Ólafur.

Gullver hélt til veiða á ný að lokinni löndun í gær.

• Blogga um frétt