Á dögunum var staðfest pöntun á Thyborøn fullfjarstýrðum toghlerum fyrir nýjan togara Gjögurs, Hákon ÞH-250.
Hinn nýi togari er smíðaður af danska skipasmíðafélaginu Karstensen og var Hákon sjósettur í Póllandi í október síðastliðnum en áætlað er að hann verði afhentur um mitt þetta ár.
Hlerarnir sem um ræðir eru af gerðinni 42 og eru þeir 12 fermetrar og vega 4,7 tonn. Í tilkynningu frá Hampiðjunni segir að „þeir eru fyrstu fullfjarstýrðu hlerarnir sem seldir eru frá Thyborøn á íslenskt skip en frá árinu 2017 hefur Thyborøn boðið upp á hlera með lúgum sem má opna og loka með glussatjakki og hægt er að breyta þegar hlerarnir koma upp aftan á skipinu.“
Hampiðjan Ísland er umboðsaðili Thyborøn á Íslandi og sá um söluna á þessu hlerapari til útgerðarfélagsins Gjögurs.
Stýrt úr brú
Í toghlerunum eru litíumrafhlöður sem og dýptarnemar og mótorstýring, ásamt tveimur botnstykkjum sem sett eru á kjöl skipsins. Búnaðurinn gerir mögulegt að stýra og breyta virkni hlerana úr brú skipsins á meðan veiðum stendur.
„Allur búnaðurinn á hlerunum, ásamt hugbúnaði í brúnni, er hannaður og framleiddur af Thyborøn fyrir utan rafhlöðuna sjálfa. Litíumrafhlaðan sem um ræðir hefur allt að 40 klukkustunda vinnutíma án þess að hlaða þurfi hana þrátt fyrir að hlerinn sé í stöðugri notkun. Um tvær klukkustundir tekur að hlaða rafhlöðuna aftur upp í 80% hleðslu og um þrjá tíma í 100% hleðslu,“ segir í tilkynningunni.
Þá segir að allan stýribúnað sé hægt að endurnýta þegar kemur að því að endurnýja þurfi hlerana sjálfa.
Nýr Hákon ÞH var sjósettur í Gdansk.
Ljósmynd/Gjögur hf.