Íslensku fiskiskipin lönduðu 1.375 þúsund tonnum

Heildaraflamagn íslenskra skipa árið 2023 var tæp 1.375 þúsund tonn að verðmæti 197,3 milljarða króna við fyrstu sölu aflans samkvæmt bráðabirgðatölum sem Hagstofa Íslands tilkynnti í dag.

Þá sést að aflamagn hafi dregist saman um 3% frá fyrra ári á meðan verðmæti aflans jókst um 1%. Vakin er athygli á að aflaverðmæti í þessu samhengi vísar til viðskipta í fyrstu sölu sem gefur ekki upplýsingar um endanlegt verðmæti sjávarafurða. Útflutningsverðmæti sjávarafurða á síðasta ári er áætlað um 352 milljarðar króna.

Frétt af mbl.is

Sjávarafurðir skiluðu 352 milljörðum króna

Þorskurinn skilaði mestu

Aflaverðmæti botnfiskafla við fyrstu sölu var tæplega 126 milljarðar króna árið 2023 sem er um 7% minna en árið á undan sem er í takti við samdrátt í botnfiskafla.

Þorskurinn var verðmætastur og skilaði 81 milljarði króna sem er 5% minna en árið 2022, en samdrátturinn í verðmætum er aðeins helmingurinn af samdrættinum í afla. Var á síðasta ári landað 220 þúsund tonnum af þorski.

Þrátt fyrir að ýsuaflinn jókst um 22% og endaði í túmum 69 þúsund tonnum skilaði aflinn aðeins 18,5 milljörðum króna við fyrstu sölu á síðasta ári, sem er 10% minna en 2022. Ufsinn skilaði 26% minni aflaverðmætum á síðasta ári sem er aðeins minni samdráttur en í afla sem minnkaði um 32%.

Best virðist hafa gengið í karfanum sem þrátt fyrir 1% minni afla árið 2023 en 2022 skilaði 9% meiri aflaverðmætum við fyrstu sölu.

Aukning í kolmunna

Alls skilaði uppsjávarafli rúmlega 51 milljarði króna við fyrstu sölu á síðasta ári sem er 8% minna en árið 2022. Þá nam uppsjávaraflinn rúm 869 þúsund tonn árið 2023 sem er 9% minni afli en árið á undan.

Íslenski uppsjávarflotinn landaði 53% meira af kolmunna á síðasta ári en árið á undan, alls 292.858 tonn og fengust 11 milljarðar við fyrstu sölu sem er 64% aukning frá fyrra ári.

Mikill samdráttur varð hins vegar í landaðri síld og loðnu, en aflinn minnkaði um 40% og 28%. Tegundirnar sáu hins vegar ekki jafn mikinn samdrátt í aflaverðmti við fyrstu sölu og skilaði síld 8,8 milljörðum og loðna tæp 19 millljörðum.

• Blogga um frétt