Sjávarafurðir skiluðu 352 milljörðum króna

Útflutningsverðmæti þeirra 707 þúsund tonna sjávarafurða sem fluttar voru út á síðasta ári nam 352 milljörðu króna sem er 18,3% meira en árið 2021. Aukningin í magni er hins vegar 9% milli ára. Þá voru þorskafurðir 40% útflutningsverðmætisins og seldust þær fyrir 141 milljarð.

Þetta kemur farm í tilkynningu á vef Hagstofu Íslands.

Fram kemur að mest hafi verið flutt út til Noregs eða um 167 þúsund tonn að verðmæti 40 milljarða króna. Þar af var mest um kolmunna, loðnu og síld í bræðslu. Svipað verðmæti fékkst vegna útflutnings til Frakklands en magnið var um 40 þúsund tonn, þar af helmingurinn þorskafurðir. Mesta útflutningsverðmætið á síðasta ári var vegna sölu sjávarafurða til Bretlands og nam það 54 milljörðum króna.

Lönduðu 1,4 milljónum tonnum

Aflaverðmæti íslenska fiskiskipaflotans árið 2022 við fyrstu sölu náði 195 milljörðum króna sem er 20% aukning frá árinu 2021 þegar það nam 162 milljörðum. Landað var 1.416 þúsund tonnum árið 2022 sem er 23% meiri afli en árið á undan.

Breytingarnar milli ára má fyrst og fremst rekja til mikillar aukningar í uppsjávarafla.

• Blogga um frétt