Flotinn landaði 65 þúsund tonnum í febrúar

Landaður afli íslenskra skipa var 65,4 þúsund tonn í febrúar 2024 sem er 56% minni afli en landað var í febrúar 2023, að því er fram kemur á vef Hagstofu Íslands. Augljóst er að loðnubresturinn er afgerandi í tengslum við samdráttinn enda lönduðu íslensku skipin 107 þúsund tonnum af loðnu í febrúar á síðasta ári en enga í sama mánuði á þessu ári.

Alls lönduðu uppsjávarskipin 25 þúsund tonnum af uppsjávarfiski í febrúar sem er 78% minna en á síðasta ári þrátt fyrir 100% samdrátt í loðnunni. Jókst kolmunnaaflinn verulega á sama tíma.

Botnfiskaflinn jókst um 10% milli ára og nam 39 þúsund tonnum í febrúar. Mesta aukningin hefur verið í ýsu, karfa og ufsa.

Fram kemur að aflamagn á tólf mánaða tímabili frá mars 2023 til loka febrúar 2024 var rúmlega 1.272 þúsund tonn sem er 1% minna en tólf mánuðina á undan. Botnfiskafli dróst saman um 11% á tólf mánaða tímabilinu á meðan uppsjávarafli jókst um 5%.

• Blogga um frétt