Útgerðir í kauphöll 31 milljarði minna virði

Markaðsvirði útgerða sem skráðar eru í kauphöllinni hefur minnkað um rúmlega 31 milljarð frá áramótum til lokun markaða föstudags 10. maí. Munar þar mestu um Síldarvinnslunnar en gengi hlutabréfa fyrirtækisins hefur lækkað um 9,8% á tímabilinu og hefur markaðsvirði félagsins þannig lækkað um 18,4 milljarða króna.

Þá hefur gengi bréfa Brims lækkað næst mest á tímabilinu eða 5,4% en á eftir fylgir Ísfélagið með 3,1% lægra gengi hlutabréfa sinna. Gengi bréfa Iceland Seafood hafa sveiflast nokkuð frá áramótum en var á föstudag hið sama og í upphafi árs.

Erfitt er að greina með vissu hvað veldur því að gengi hlutabréfanna hefur lækkað, en einhverjar líkur eru á að loðnubrestur hafi haft nokkur áhrif þar sem það hafi bein áhrif á afkomu Síldarvinnslunnar, Brims og Ísfélagsins. Einnig hefur verið töluverð óvissa tengt rekstri Vísis, dótturfélags Síldarvinnslunnar í Grindavík, vegna jarðhræringa og eldgoss.

Sveiflast nokkuð

Hlutabréf allra félaga hefur sveiflast frá áramótum. Var gengi bréfa Síldarvinnslunnar í upphafi árs 102 krónur á hlut en náði hámarki 19. janúar þegar það fór í 109 krónur en var í lok síðustu viku komið í 92 krónur. Svipaða sögu er að segja af bréfum Brims sem hófu árið á 82,2 krónum á hlut og náðu hæst 86,6 krónum 19. janúar en tóku svo að lækka og stóðu í 77,8 krónum á föstudag.

Bréf Ísfélagsins hófu árið á 160 krónum en komust upp í 165 krónur 5. janúar en voru við lok síðustu viku komin í 155 krónur.

Vert er að geta þess að staðan á mörkuðum eins og hún var í hádeginu í dag hafði gengi bréfa Brims lækkað um eitt prósent í 77 krónur á hlut og bréf Ísfélagsins hafa hækkað um 0,33% í 155,5 krónur. Önnur félög hafa staðið í stað.

• Blogga um frétt