Héldu til vistkerfisrannsókna

Bjarni Sæmundsson, rannsóknaskip Hafrannsóknastofnunar, hélt í árlegan vorleiðangur í gær. Um er að ræða verkefni sem er hluti af langtímavöktun hafs og eru framkvæmdar vistkerfisrannsóknir á dýrasvifi, plöntusvifi, næringarefnum, hita og seltu í hafinu umhverfis Ísland.

Fram kemur á vef Hafrannsóknastofnunar að árferðisrannsóknir á þessu sviði hafa farið fram á þessum árstíma á hverju ári í um 60 ár.

„Ásamt því að kanna ástandið á ákveðnum staðsetningum, svokölluðum sniðum, út frá landinu eru gerðar mælingar með síritandi mælitækjum á siglingaleið skipsins. Magn og útbreiðsla ljósátu er mæld með bergmálstækni og samhliða eru ljósátusýni skoðuð. Magn gróðurs er mældur með blaðgrænumælingum og líffræðileg fjölbreytni plöntusvifs er rannsökuð með smásjá og erfðafræði. Einnig er sýnum safnað fyrir Geislavarnir ríkisins vegna vöktunar á magni geislavirkra efna í sjó.“

Áætlað er að leiðangurinn taki 15 daga.

Bjarni Sæmundsson lét frá bryggju í gær. mbl.is/Hafþór

• Blogga um frétt