Opnað fyrir skráningu á 14. sjávarútvegssýninguna

Opnað hefur verið skráningu gesta á 14. Íslensku sjávarútvegssýninguna sem haldin verður 18.-20. september næstkomandi í Fífunni í Kópavogi. Á þessu ári verða liðnir fjórir áratugir frá því að fyrsta sýningin var haldin.

„Á sýningunni er að finna það sem hæst ber í þróun, nýsköpun, vöruframleiðslu og þjónustu, allt það sem knýr greinina áfram og færir hana upp á nýtt stig í framleiðni, skilvirkni og sjálfbærni,“ segir í tilkynningu á vef skipuleggjenda.

Fleiri en 400 íslensk sem erlend fyrrtæki munu sýna vörur, þjónustu og nýsköpun sína á sýningunni. Segja skipuleggjendur tækifæri gefast til að mynda viðskiptasambönd og efla tengslanetið.

„Gestir geta einnig nýtt sér fyrirtækjastefnumótin, sótt áhugaverða ráðstefnu, afhendingu Íslensku sjávarútvegsverðlaunanna og sérstakar vörusýningar á nýstofnuðu kynningarsvæði,“ segir í tilkynningunni.

• Blogga um frétt