Áhöfnum á Sturlu og Valdimar sagt upp

Áhöfnum á togaranum Sturlu GK-12 og línuskipinu Valdimar GK-195, sem Þorbjörn gerir út, hefur verið sagt upp. Þetta staðfestir Gunnar Tómasson, framkvæmdastjóri Þorbjarnar, í samtali við 200 mílur.

Hann segir uppsagnirnar lið í endurskipulagningu veiðistjórnunar útgerðarinnar á komandi fiskveiðiári sem hefst 1. september næstkomandi og tengjast breytingarnar meðal annars komu nýs skips í flota félagsins, en í sumar kemur ný Hulda Björnsdóttir GK-11 til landsins.

Þá er gert ráð fyrir að skipverjunum á Sturlu og Valdimar verði útveguð önnur störf. „Við erum ekki að fækka sjómönnum,“ segir Gunnar.

Einnig uppsagnir í síðustu viku

Í byrjun síðustu viku var greint frá því að öllum 56 starfsmönnum í landvinnslu Þorbjarnar hefði verið sagt upp. Mátti rekja þær uppsagnir til tíðra truflana á framleiðslu vegna jarðhræringanna í Grindavík.

„Það var niðurstaða okkar að menn treysta sér ekki til að halda áfram eins og verið hefur og við ætlum að taka okkur góðan tíma til að endurskipuleggja okkur og vonum að þetta ástand fari að róast,“ sagði Gunnar við tilefnið.

Frétt af mbl.is

Sögðu upp 56 starfsmönnum

• Blogga um frétt