Í gær greindi mbl.is frá því að Bond-leikarinn Pierce Brosnan færi með hlutverk Íslendings í Eurovision-söngvamyndinni sem verður að hluta til tekin upp á Íslandi. Fram kemur á vef Deadline að Brosnan muni leika Íslendinginn Eric Ericksong, föður persónu Will Farrels í myndinni.
Í grein Deadline er persónu Brosnan lýst sem „myndarlegasta manninum á Íslandi“. Brosnan er vanur að leika myndarlega karlmenn sem njóta mikillar kvenhylli. Hann hefur einnig reynslu af því að syngja og kom útlitið og söngurinn við sögu í Mamma Mia-myndunum.
Will Farrell skrifar handritið að myndinni ásamt Andrew Steele. Sjálfur leikur Farrell Lars Erickssong og Rachel McAdams leikur Sigrit Eriksdottir. Persónur Farrells og McAdams eru íslenskt tónlistarfólk í basli.
Íslenskir leikarar koma einnig við sögu en á vef Imdb kemur fram að Jóhannes Haukur Jóhannesson, Björn Hlynur Haraldsson, Nína Dögg Filippusdóttir og Álfrún Gísladóttir fari með hlutverki í myndinni, en fregnir herma að Ólafur Darri Ólafsson og Hannes Óli Ágústsson muni einnig fara með hlutverk í myndinni, sem er framleidd fyrir streymisveituna Netflix.