Öldungadeildarþingmenn brasilíska þingsins kusu með tillögu um að ákæra Jair Bolsonaro, forseta landsins, fyrir að hafa sinnt kórónuveirufaraldrinum illa í embætti.

Meðal ákæruliða eru ákvæði um glæpi gegn mannkyni. Alls hafa 600 þúsund manns látist af völdum veirunnar í Brasilíu.

Tillögurnar sem brasilíska þingið kaus um verða sendar til ríkissaksóknara, sem Bolsonaro skipaði sjálfur.

Ólíklegt að Bolsonaro verði ákærður

Engan veginn er hægt að slá því föstu að atkvæðagreiðslan í þinginu verði til þess að Bolsonaro verði ákærður, eins og segir í frétt BBC, enda þykir líklegt að ríkissaksóknari í landinu standi með forsetanum.

Tillögurnar að ákærunni útlista hvernig Bolsonaro á að hafa fylgt stefnu í heilbrigðismálum sem gerði það að verkum að veiran breiddist úr svo um munar, undir því yfirskini að ná hjarðónæmi meðal íbúa landsins.

Auk ákæru fyrir glæpi gegn mannkyninu eru í tillögum þingsins átta aðrir ákæruliðir útlistaðir. Þar á meðal eru ákæruliðir er snúa að skjalafalsi og brotum gegn lögum um velferð. Þá er Bolsonaro gefið að sök að hafa misnotað skattfé og ýtt undir dreifingu falsfrétta um faraldurinn.