Tveir sjúklingar með Covid-19 létust á Landspítalanum um helgina. Þetta staðfestir Már Kristjánsson, yfirlæknir smitsjúkdómadeildar á Landspítala, í samtali við mbl.is.

Að sögn Más eru 34 einstaklingar með Covid nú inniliggjandi á spítalanum og liggja þeir á níu starfsstöðum hans. Enginn er á gjörgæslu eins og stendur.

Már segir stöðuna snúna. Nú sé orlofstími og mikil veikindi meðal starfsmanna. Mönnunarvandamál séu því í hámarki.

Frétt af mbl.is

Snúin staða vegna fjölgunar Covid-veikra

Opinberar tölur sýna að um 200 manns greinist nú smitaðir af veirunni daglega.

Grímuskylda starfsmanna, sjúklinga og gesta var endurvakin á spítalanum 16. júní í kjölfar fjölgunar smita. Þá voru heimsóknir til sjúklinga á legudeildum einnig takmarkaðar.

Frétt af mbl.is

Kórónuveiran síður en svo uppiskroppa með fóður

Þórólfur Guðnason sóttvarnalæknir sagði í samtali við mbl.is fyrr í dag að fólk sem liggur á spítalanum sé mikið til eldra fólk með undirliggjandi sjúkdóma. Þó veikist ungt óbólusett fólk einnig mikið. Lítið væri þó um endursmit.