Landssamband veiðifélaga hefur ákveðið að kæra ákvörðun lögreglustjórans á Vestfjörðum um að hætta rannsókn á máli Arctic Sea Farm ehf. 3.500 eldislaxar eru taldir hafa sloppið úr fiskeldisstöð fyrirtækisins í Patreksfirði í ágúst.

Sambandið telur að gögn málsins beri með sér að verulegir og margþættir ágallar séu á rannsókn málsins, að því er fram kemur í tilkynningu.

Frétt af mbl.is

Lögreglan hættir að rannsaka Arctic Sea Farm

Í fyrsta lagi hafi ekki farið fram sjálfstæð rannsókn á atvikum málsins. Lögreglan hafi ekki framkvæmt vettvangsathugun heldur látið nægja að taka skýrslu af sakborningi, framkvæmdastjóra Arctic Sea Farm, og einum starfsmanni fyrirtækisins.

Gunnar Örn Petersen, framkvæmdastjóri Landssambands veiðifélaga. Ljósmynd/Stóra - Laxá

Telur lögreglustjóra vanhæfan

Í öðru lagi gagnrýnir sambandið lögreglustjórann fyrir að rugla saman meginreglum um saknæmi og muninum á almennum refsimörkum og sérrefsimörkum. Að mati sambandsins eigi að beita refsiábyrgð ef um er að ræða einfalt gáleysi.

Telur sambandið lögreglustjórann ekki hæfan til að fara áfram með rannsókn málsins.

Loks nefnir sambandið að í gögnum málsins komi fram fjölmargar ákvarðanir sakbornings og starfsmanna Arctic Sea Farm sem renni stoðum undir að meiri líkur en minni séu á að um refsivert athæfi hafi verið að ræða, samkvæmt 22. gr. laga um fiskeldi nr. 71/2008.